Nan zafé lanmou,men m lejé.
Ké m chaje ak lanmou
Pou tout moun ki sou laté
Rich kou póv,blan kou nwé,
Nég debyen kou malketé.
Lanmou m pa gen lizyé
Li leve toupatou
Tankou zéb,san prejije koulé
San gran panpan san fé wé.
Tank ou pile l,koupe l,rache l
Se tank li grandi,donnen, vin pi bél
Pi fre pi enganm,pi djanm.
Pou ta rive detwi lanmou nan ké m
Fó w ta domi ta leve boné
E menm lé sa ankó fó w ta cheché konnen anpil lót sekré
Paske lanmou m se misté
Chimen l fét an fé.
Ki donk menm bouldozé pa fé l pé.
Nan kalfou l vévé Ezili trase a lanvé,
Malé a mouche Lisifé
Si l konprann li ka vin drive l até.
La byen sezi wé ke l pa an afé ak yon bégwé.
Kwé m si w vle,lanmou m se gwo zafé
Li pa janm met tet até;
de tét li l toutjou fyé,
paske l toujou klé
nan tout sa lap fé.
Lanmou m santi bon epi l abiye ché
Menm lé l pa gen pa ta gen pesonn pou l al wé
Sa pa anpeche l chélbé, brodé,
Ou pa fouti di ke sak sou li se pépé.
E si pou frekansite w
ou ta di sa a,penón pa tat kré w.
Si w ap chéche blofé
Pa pase pre lanmou m paske loné ak Respé
Se sa k pou li fyéte ,boné,ak lone.
Si w vle kwe kwe:
Lanmou m ka fé w reve je klé
Wé sa w pa ta janm rive kwé,
Menm je klé.li ka fé pale tout lang sou laté
Menm lé w ta bébé
Fé yon avég wé tout koulé
Kalme tout mizé,tout doulé;
Fé vin dous kou siwo myél
Menm sa k te anme kou fyél.
Pa gen annyen lanmou m pa ka fé
Pou sila yo nan li ki kwé
E menm sa ki refize kwé.
Paske lanmou m san devan ni déyé,
San landwat,ni lanvé,
San anba ni anlé
,men l chaje ak pwofondé.