Depi m gade w
M anvi bò w,
Anbrase w,
Karese w.
Depi m wè w
M anvi frape pòt kay ou,
Mande w antre
Kote je m pa janm kontanple
inik kote , mwen plis ke sèten,
ki ka fè m santi m byen
Sanm pa bezwen fimen, enjekte m
Oubyen bwè
Jis mwen soule m.

Yon kote
M ta ka konpare
Ak tè sa a Granmèt la
pa janm sispann promet la.
M swete li va padone m,
Si m peche
Oubyen non l ofanse
Oubyen blasfeme.

Lakay ou se paradi,
Se jaden ke menm Edenn
Poko prèt pou l ta konpare l avè l.

Depi je m tonbe nan je w
Ou fè san m mache
M pa konn kote mwen ye,
Mwen pran depale
Mwen tankou yon egare,
Mwen pèdi tout panse m
Kòmsi m ta gen yon mò lanmou sou mwen ;
Kè m pa janm sispan reklame w:
Lè m pa wè w
M imajine w
Lè w avè m
M pa konn ki sa pou m ta fe
Pou m konble
San m pa kite menm yon ti espas vid.

Kay ou paradi m
Inik kote m santi m byen.
Le w pa la m imajine w
Jis mwen envante w
Le ou la mwen kontanple w
Admire w, goute w savoure w
San m pa janm kontante.

Le w avè m
Ou anvayi m
Ak anvi…

M anvi w fè m santi chalè w,
Respire lodè w.
M anvi mòde w,
Souse w, niche w
Moulen sanm pa janm vale w
Savoure w.

M anvi abite lakay ou
Pou tout tan gen tan
Promennen, fè ti ale tounen,
Netwaye chanm ou
Retire tout fil arenyen
Bale rouze jaden w
Dekore fasad ou
Meble salon w
Desann anba lakay ou
Konvèti w an kay
Ki gen plis konfò
Plis dekorasyon
Kay kote solèy pa derange
Kote l pa janm fe ni twò cho
Ni twò frèt,
Kote lalin ak zetwal
pote sou zèpòl yo tout rèv nou
tout angrois nou,
pou nou ka jwi ekzistans
san n pa sonje si ye ni demen ekziste.

kay kote pipirit mwen
pijon m oubyen kòk mwen
ka chante nan lakou l
lajounen tankou nan nwit.

Devan kay, nan lakou w
mwen san zam
San fòs, ou pran tout nanm mwen
Yon sèl bagay ki nan lespri mwen
Abite w pou letan e letènite.

Bo kote w se paradi
Lwen w se lanfe!

Camilingue